ಹಣಕಾಸು ಮಾರುಕಟ್ಟೆಯಲ್ಲಿ ಏರಿಳಿತ ಹೆಚ್ಚುತ್ತಿರುವ ಸಮಯದಲ್ಲಿ ಅನೇಕರು ಸುರಕ್ಷಿತ ಹೂಡಿಕೆ ಮಾರ್ಗಗಳತ್ತ ಮುಖ ಮಾಡುತ್ತಿದ್ದಾರೆ. ವಿಶೇಷವಾಗಿ ಮೂಲಧನ ಭದ್ರತೆ ಮತ್ತು ನಿಯಮಿತ ಆದಾಯ ಬಯಸುವವರಿಗೆ ಫಿಕ್ಸ್ಡ್ ಡಿಪಾಜಿಟ್ (FD) ಇನ್ನೂ ವಿಶ್ವಾಸಾರ್ಹ ಹೂಡಿಕೆ ಆಯ್ಕೆಯಾಗಿ ಉಳಿದಿದೆ.
2026ರಲ್ಲಿ ಹಲವು ಬ್ಯಾಂಕ್‌ಗಳು 5.75 ಶೇಕಡದಿಂದ 7.75 ಶೇಕಡದವರೆಗೆ FD ಬಡ್ಡಿದರ ನೀಡುತ್ತಿವೆ. ಕೆಲವು ಸ್ಮಾಲ್ ಫೈನಾನ್ಸ್ ಬ್ಯಾಂಕ್‌ಗಳು 8.10 ಶೇಕಡದವರೆಗೆ ಬಡ್ಡಿ ಘೋಷಿಸಿದ್ದು, ಹೂಡಿಕೆದಾರರ ಗಮನ ಸೆಳೆಯುತ್ತಿವೆ. ಹಿರಿಯ ನಾಗರಿಕರಿಗೆ ಹೆಚ್ಚುವರಿ 0.25ರಿಂದ 0.75 ಶೇಕಡದವರೆಗೆ ಹೆಚ್ಚುವರಿ ಬಡ್ಡಿ ಲಭ್ಯವಾಗುತ್ತಿದೆ.
₹1 ಲಕ್ಷವನ್ನು FDಯಲ್ಲಿ ಹೂಡಿಕೆ ಮಾಡಿ ಮಾಸಿಕ ಬಡ್ಡಿ ಆಯ್ಕೆಯನ್ನು ಆರಿಸಿದರೆ, ಪ್ರತಿ ತಿಂಗಳು ಸ್ಥಿರ ಆದಾಯ ಪಡೆಯಬಹುದು. ಬ್ಯಾಂಕ್ ಮತ್ತು ಬಡ್ಡಿದರ ಆಧಾರದ ಮೇಲೆ ಸಾಮಾನ್ಯ ಗ್ರಾಹಕರಿಗೆ ತಿಂಗಳಿಗೆ ಸುಮಾರು ₹479ರಿಂದ ₹554ವರೆಗೆ ಆದಾಯ ಸಿಗುವ ಸಾಧ್ಯತೆ ಇದೆ.
ಪ್ರಸ್ತುತ ಆಕ್ಸಿಸ್ ಬ್ಯಾಂಕ್ ಸುಮಾರು 5.75 ಶೇಕಡ ಬಡ್ಡಿದರ ನೀಡುತ್ತಿದ್ದು, ತಿಂಗಳಿಗೆ ಅಂದಾಜು ₹479 ಆದಾಯ ಲಭ್ಯವಾಗಬಹುದು. HDFC ಮತ್ತು ICICI ಬ್ಯಾಂಕ್‌ಗಳು 6.25 ಶೇಕಡ ಬಡ್ಡಿದರದೊಂದಿಗೆ ತಿಂಗಳಿಗೆ ₹521ರವರೆಗೆ ನೀಡುವ ಸಾಧ್ಯತೆ ಇದೆ. ಕೋಟಕ್ ಮಹೀಂದ್ರಾ ಬ್ಯಾಂಕ್ ಸುಮಾರು 6.50 ಶೇಕಡ ಬಡ್ಡಿದರ ನೀಡುತ್ತಿದ್ದು, ₹542ರವರೆಗೆ ಮಾಸಿಕ ಆದಾಯ ಸಿಗಬಹುದು.
ಇನ್ನು ಯೆಸ್ ಬ್ಯಾಂಕ್ 6.65 ಶೇಕಡ ಬಡ್ಡಿದರದೊಂದಿಗೆ ತಿಂಗಳಿಗೆ ಸುಮಾರು ₹554 ಆದಾಯ ನೀಡಬಹುದು ಎಂದು ಅಂದಾಜಿಸಲಾಗಿದೆ. ಹಿರಿಯ ನಾಗರಿಕರಿಗೆ ಇದೇ ಬ್ಯಾಂಕ್‌ನಲ್ಲಿ 7.75 ಶೇಕಡ ಬಡ್ಡಿದರ ಸಿಗುವ ಸಾಧ್ಯತೆ ಇದ್ದು, ತಿಂಗಳಿಗೆ ₹646ರವರೆಗೆ ಆದಾಯ ಪಡೆಯಬಹುದು.
ಸೂರ್ಯೋದಯ ಸ್ಮಾಲ್ ಫೈನಾನ್ಸ್ ಬ್ಯಾಂಕ್, ಉತ್ತಕರ್ಷ್ ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಹಾಗೂ ಜನ ಸ್ಮಾಲ್ ಫೈನಾನ್ಸ್ ಬ್ಯಾಂಕ್‌ಗಳು ಹೆಚ್ಚಿನ FD ಬಡ್ಡಿದರಗಳ ಮೂಲಕ ಗ್ರಾಹಕರನ್ನು ಸೆಳೆಯುತ್ತಿವೆ. ಆದರೆ ಹೂಡಿಕೆ ಮಾಡುವ ಮೊದಲು ಬ್ಯಾಂಕ್ ವಿಶ್ವಾಸಾರ್ಹತೆ, ತೆರಿಗೆ ಬಳಿಕದ ಲಾಭ ಮತ್ತು ಮುಂಗಡ ಹಣ ತೆಗೆಯುವ ನಿಯಮಗಳನ್ನೂ ಪರಿಶೀಲಿಸಬೇಕು ಎಂದು ಹಣಕಾಸು ತಜ್ಞರು ಸಲಹೆ ನೀಡಿದ್ದಾರೆ.
